Berpêlk

Bêserûşûnbûyîna mamê wî, kuştina heval û dostên wî… Herî dawiyê brayê wî jî yekser bêserûşûn dibe. Ew bi xwe jî hîç li deverekê cihgir û cihwar nabe. Neçarî ti caran pêşiya wî bernade lê gelek carinan karên gelek baş biserektî jî dike. Çîroka jiyana wî ji salên 1960-ê hêj dema ew nû dest bi dibîstanê dike destpê dike, di salên 1970-yan de êdî ew xortekî şoreşger e, têra xwe çavnetirs e jî. Ev sal, her ew sal in dema Şoreşa Îlonê li başûrê Kurdistanê bi ser dikeve, rejîma Be'siya xedar ya Bexdayê neçerî erêkirina Peymana Otonomiya Kurdistanê dike ko, ev şoreş li herçar parçeyên Kurdistanê karîgeriyeke mezin, dengvedenaka li ser hest û bîrûbaweriya neteweyî ya miletê kurd pêk tîne. Her ew salan in dema peymana qirêj ya Cezayîrê di 1975-ê de li dijî çarenûsa miletê kurd hatî îmze kirin ko, bûyî sedem şoreşê li başûr şikesteke mezin bixwe û bikeve di werçerxena şoreşek dî de ya ko jê re dibêjin Şoreşa Gulanê… Di Şerê Bizava Rizgariya Neteweyî ya di bin pêşivaniya Mela Mistafa Barzanî şikestin çêdibe lê radestîbûn çênabe, şerê rizagriyê berdewam dike, dikeve werçerxaneke nû.